وشلون ماحبه .؟؟ وانا ميت(ن) فيه

قالو تحبـه قلـت حـب ٍ جنونـي = وشلون ماحبـه ونـا ميتـن فيـه




اللي غلاه مشيبـن فـي عيونـي = بـاه الحـلا مافيـه زول ٍ يحاليـه


قالـو بـلاده قلـت لاتنشـدونـي = العلم عند القلب والقلـب مخفيـه


ناب الردايف هو سبايـب طعونـي = سيطر على الخافق وثبت عراويـه


قالو من اللـي يتبعـن الضعونـي = ولا من اللـي لـه عبيـد ٍ تلبيـه


وثـر عليـه قولهـم وحرجونـي = ثم قلت خلـي مبعدينـن مراميـه


بدو الشدايـد مخلفيـن الظنونـي = اللي لغاهـم بـس ياهيـه ياهيـه


اهل الـدلال متعبيـن الصحونـي = يفرح بهم رجلين الجـوع طاويـه


قالو حنون وقلـت طبعـاً حنونـي = احن من غالى على شوف غاليـه


يقولـي لبطيـت وشبـك تخونـي = وجمـع الاعـذار قدمـه وهديـه


اخاف اسولف والعرب يسمعونـي = ويبدا النقاش وهرجنا الناس توحيه


والناس فى هرج القفـا يفرحونـي = وللي يجيـب العلـم لـزم يوديـه


قالو من ايات المـلا وش يكونـي = قلت بدوي(ن) ماعرف كلمة اوكيه


نهارهـا مـع ناسعـات المتونـي = تركض ورى المقهور والذود تدعيه


مرن تجي قدمه وتمـش بسكونـي = ومرن تجي خلفه ومـرن تباريـه


ابو جديلـن تحـت حـد المتونـي = دهنه وصابونـه عبسهـن مغذيـه


ماحطت المكياج مـن كـل لونـي = جمـال ٍ اصلـي بيناتـن مواريـه


احبهـا حـب البـدو للمـزونـي = حب (ن) شريف ٍ مادخل فيه تشويه


هـي غايتـي وفراقهـا مايهونـي = ولو طالت الايـام مانـي بناسيـه


تكفون يهل صويحبـي تفهمونـي = روفم بحالي لاتقولـون لـي ليـه


انا بليت بحـب ضـاف القرونـي = وفي حب خلي ماعليـه مشاريـه


ان صحت ولا طحـت لاتواخذونـي = هو الطبيب اللي صوابـي يداويـه


ون كان في سلم العرب تمنعونـي = لاني بعيد ودونـي الغيـر حاديـه


ماضنتـي يسلـى ويدلـه بدونـي = ونا خيالـه دايـم الـدوم اناجيـه


ان راح عنـي ودعنـه عيـونـي = ون عاد يمـي قلـت يالله تحييـه